يالفيلسوف اللي تنومس بالاعلام

[عيد غانم الشراري]

يالفيلسوف اللي تنومس بالاعلام
وتفخر تقول انك تعلمت برًّى

وحصلت من تعليمك ادروع ووسام
وتشوف نفسك فوق مالا تورًّى

ماسجل التاريخ لك بصمة ابهام
وعن لازم اللي جاك دايم تذرًّى

متغطرساً والنقص سبب لك اوهام
وقصر عيونك بالنظر والمغرًّى

ومخرجك وانتاج المسلسل والافلام
ماله مع الناموس علماً يطرًّى

ثقافتك مجرد اهروج وارقام
وعند اللزوم تغادر أقرب ممرًّى

قدمت بصحون العسل سمك السام
ورديتها لك علقماً فيه مرًّى

جيتك خفى ماجيت مثلك على العام
ناصح ولالي مصلحه واتشرًّى

وتقول جهراً ماني بحاجة افهام
وشهادتك منها تقول اتبرًّى

طوعتك وحطيت في خشمك اخزام
ودقيت سلفك مع طريق المسرًّى

وليلك غدى ليلين وانا لك ابلام
واعطيتك الميسم على نار حرًّى

لو كنت انا أصغر منك تعليم واعلام
عندي على الطولات عزماً تجرًّى

ليًّه مكان القدر بالصف قدام
يوم ان مثلك من مكانه يعرًّى

ماهي تراها بالمؤهل والاقلام
هي بالسعد والموقف اللي يسرًّى

المرجله ماهي تهذري بالاحلام
تبغالها شبلاً عليها مضرًّى

كفواً لها اللي بالمواقيف ضرغام
قرماً يقوم ابلازمه ماتحرًّى

ماينتظر توجيه بالموقف الهام
يقرى الكتابه ماعليها يقرًّى

حصناً حصين وهيبته درع وحزام
يذري ذراه ولا بغيره تذرًّى

متواضع ومتمثل بدين الاسلام
والكبر ماله فيه مثقال ذرًّى

والطير لو طار بجناحينه وحام
وقع مثل ماطار ماله مفرًّى

عيدغانم الشراري