أهل الطيب

ماشاب حرف الشعر والقاف ماشاب
اطوٍّع المستعصيه من بحوره

اطرق جميع اغراضه ومنه ماهاب
متمكناً وانحت صخر من صخوره

فيه ارتقي باسلوب وعلوم الاداب
ولي باحترام الناس نفساً غيوره

ولاكل درباً فيه يفتحلي الباب
مامشيه لو املك بطاقة عبوره

احب رجم النايفه راس مرقاب
واكره طريق المنعطف مع حدوره

ولا احب اللي به ابرود الاعصاب
اللي تساوت غيبته مع حضوره

ولا احب اللي تنابز باالالقاب
واحب من يحمد ونفسه شكوره

ماكل طيراً له جناحاً ومخلاب
حراً وكلاً مع فصيلة طيوره

اقدٍّر اهل الطيب لو كانو اجناب
واسمع من اهل الراي واهل المشوره

وشلون لاصارو لي أصحاب واقراب
من روس ربعي والعلوم امخبوره

ومدح الذي علمه مع الطيب له طاب
اللي كسب علماً من الطيب سوره

يستقبلك بااهلاً هلا زين ترحاب
في مجلساً ينطحك ريحة بخوره

عايش فنخور ونعم مع كل الاطياب
اللي بذكر الطيب فاخر عطوره

اليا حضر وان غاب يحسب له احساب
من طيب راسه ماقصرت به اشبوره

لاجت عريه له ولاهي له اغراب
ولا اخذ فيها منصه ودوره

غريزةً به ساس من رب الأرباب
ماهي تصنع فيه ساس ابشعوره

ابوبدرباالطيب له خيل وركاب
والسبق شوطه حققه في ظهوره

والنعم تنطح نعم كفواً لها جاب
بالفعل ماجت عابره مع مروره

يستاهل التقدير مع كل الاعجاب
اللي كتابه تفتخر به سطوره

وأخوانه ونعماً بهم مخلب وناب
احرار وذيابه اسود اونموره

جميعهم عينين في راس ونصاب
بالمرجله والطيب كلاً بدوره

وعيالهم بالمرجله روس وارقاب
مادنقو بااللازمه والضروره

ماهم عن الواجب ولايوم غيًّاب
متوارثيناً طيبهم من جذوره

والمعطي اللي باامره اتصير الاسباب
اللي جلى عن ظلمة الليل نوره

والحظ ماهو بين ناهب ونهاًّب
والرزق عند الله موزع اموره

ماكل راعي كيف للنار شباب
احياناً الصوره تجي عكس صوره

يابعد فرق اكتاب عن منهج اكتاب
بعد الحديثه عن ضواحي شروره

الشاعر عيدغانم الشراري