وش فيك ياصدري

الغالي سليمان العجيلي ، صح بدنك والجزاله انت راعيها يابو فارس الشعر شوارد صيد وانا مثل ماقلت اكثر من مره ما اضمن باي قصيده لي الا الصدق اما سبك القصيده وصورها تبقى أسيرة خيال الشاعر وما فيه شاعر يحكم على قصيده له الحكم لك انت وامثالك من متذوقين الشعر ونقاده ، عاجز عن شكرك دوم تدعمني وترفع معنوياتي يابو فارس أسعدني كلامك عني وافرحني مرورك لأخلا ولاعدم تقبل احترامي وتقديري

الغالي نايف علي العنزي هلابك هلا وغلا صح بدنك والله يبن العم انا عايشين بزمن اختلط فيه الحابل بالنابل تربينا تربيه ماتنفع لزمنا هذا 40 سنه وعليهن كم شهرفراطه يعني افنيت عمري كله بخدمة الدوله وهذا اكيد انه شرف لي سلاحي أمانتي واخلاصي وصدقي وكلها أسلحه قديمه مع الأسلحه الفتاكة المستعملة الان جت ناس أكلت الأخضر واليابس قصدي اليابس واليابس منين خضرياحسره 20 سنه ماربعنا لكن عقولهم تجاريه ناس تشتغل وحنا عيب وحرام وهم بعد جزاهم الله خير ينصحونا بالبعد عن المال الحرام الاخوان خلال ثلاث اربع سنين واحدهم يالله يرد السلام واحد من إياهم كنت انا أمين الصندوق وهو على البند فجاه يقولون ثمنوا له مزرعه مدري بيت (يقولون) وربك المعطي وأخذ شهاده ماجستير من ام درمان ودكتوراه من جامعه نسيت اسمها (يادنقله يامنقله) حديهن وكاد وصار مديري وابلشني كل مامًره بحكم الارتباط ليه مقفل جوالك وليه وليه سكت مره مرتين ثلاث طولها جيته له مره ومكتبه مليان من الطبقه (المخمليه) كررها ازهم عليك وجوالك مقفل ينذخ عند (القماعه) من قرادته هكااليوم لافتني الجنيه قلت ابو فلان والله انك دايم تحرجني حنا يالطبقه (الكرتونيه) احيان نحتاج ونبيع الجوال وأنتمصرف به نأكل الأكل اهم من السوالف والمسجات الجويعان ماله خلق يمسج كأنك فسيقان عاد هو جواله تقل تلفزيون قيمته تعرس بها الظاهر اني عفست مزاجه عقب القهبده انفشل وتغير وجهه العلم نور الرجال درس وحنا على الكفاءه وذكي حتى تخرج وهو يدوج معنا انا تهولت يوم أخذ الشهادة قلت ماراح قال سكرتيره انت بدوي ماسمعت بالدراسة عن بعد هزيت راسي كأني فهمت وانا ولا ادري وشلون عن بعد ليومك هذا الزبدة اخوك عقب الإخلاص الاربعيني تقاعد وسووا له مسير مكافأة نهاية الخدمه 6 رواتب كيفت حول ثمانين الف مبلغ بحياتي ماطب حسابي رفعوهن للوزاره واتحرا واتحرا طولن راجعتهم اثريهن جن ولط البنك العقاري نصهن والنص الثاني قالوا انت رصيد اجازاتك سالب لطوه هم لا وطلعوا يطلبوني 20 الف نحشت وهالحين يدوروني هههههههههههههههههههههه عاد مواعد ام فيصل بسفره برد وجهي عندها بس ما علمتها بشي قلت يقولون يتاخرن قالت اللي عند الحكومة مايضيع ههههههههههههههههههههه طلعت مثلي ماتفهم عمري ضاع النوب 6 رواتب ، شباب اللي عنده خبره ويقدر يفيدني ابي أساله انا يوم اتوظف كنت مريش معي سياره ونشاط اطرح البعير والأمور طيبه والحين حالتي حاله ديون ورجلي بدون سياره وصحتي راحت سؤالي لو ارجع لهم اتوظف واخدم 40 سنه ثانيات اقدر ارجع لمكاني الاول قبل اتوظف ههههههههههههههه مخ ، اخوي ابو علي سامحني شطحه مبطي ماشطحت وأبي افضي عن صدري وانت ولد عمي وآمون عليك الله يجزاك خير على كل كلمه قلتها عني غالي ومقامك عالي يابو علي ، محبتي

الشاعر المبدع هو من يستطيع ان يقتاد المتلقّي برفق وهدوء الى مضمون النص وهذا مالمسته في هذا النص الفاخر ,, الشكر لك شاعرنا وصح لسانك

الغالي ، جمر الغضي ، صح بدنك تسلم الله يطول عمرك ويجزاك خير على كل كلمه قلتها عندي انا شاعر وقودي معنوي با لدرجه الاولى مهو كره للماده اومحاربه لمن يتقاضاها مقابل جهد يبذله الشعر موهبه من حق الشاعر ان يعمل بها مايراه مناسب له ولكن بالنسبه لي دورها ثانوي الأهم عندي كلمه ثناء اخذتها مكافاه منك ومن أمثالك من متذوقين الشعر مقابل اجتهادي وحرصي على نيل رضاكم اخوي جمر الغضى علني فداك انا والشعر ما قيمة الشعر بدون جمهوره ، ولاشي ، أكرر شكري لك على كل حرف كتبته عني وتقبل احترامي وتقديري

تقول دنق قلت ما يوم دنقًت " تقول عش واختل وغيرك ختلها

دمت بهذا العطاء الفاخر اثريتنا يا ابو فيصل
بنوادر الشعر والمفرده
لك ودي

تثبيت

محمد النصره الشراري ، مع فصاحتي تخونني الكلمات امام قامة هذا الانسان الشامخة والله يابو نواف ان تعاملك معي بها ألطريقه المفعمة بالمحبه لي وللشعر اعتبرها وسام شرف واي شرف حاولت ان اجد من الكلمات ما اعبر به عن شكري لك فلم اجد الا الدعاء لك بالعمر المديد والسعادة وراحة البال لأخلا ولاعدم منك ومن أمثالك من الرجال ، تقبل محبتي واحترامي

صح لسانك يابو فيصل عذراً لم ارها الا في هذا الوقت

جزل كالعادة دام عطائك وبوحك الممتع

تحياتي لك ،،