أداوي جروح الزمان بصلاتي // لو إنها تنزف على فقد سلمان- لـ مطلق الأسمر اللغبه

مثل الجبل ثابت..وديني ثباتي=عندي على حكم القدر..صبر وايمان
واداوي جروح الزمان بصلاتي= لو انها تنزف على فقد سلمان
اللي يعادل في حياتي..حياتي = موته مصيبه ، والمصايب للانسان
ومصيبة المؤمن من المكرماتي=إذا احتسب..يكسب مثوبه وغفران
وانا أحتسبت الأجر والخير ياتي=من واحد(ن) فضله وعدله بميزان
واللي يعزيني ويجمع شتاتي= دينه على التوحيد .. سنه ، وقرآن
زار الحرم عمره بصوم وصلاتي=وموته بشهر المغفره..شهر الاحسان
وجاه القدر صايم وقبل المماتي= رفض يذوق الماء ولو كان عطشان
عساه يشرب سلسبيل(ن) فراتي= في جنة الفردوس بانهار وإجنان
يدخل مع الريان باب النجاتي=ويبتل من عقب الضمى كل شريان
الله يبيحه عالم الخافياتي= وانا يعوضني مع الصبر سلوان
كل ما بغيت أمحاه من ذكرياتي= جاني بذكرى جاوزت كل نسيان
حتى وانا نايم بغمرة سباتي= يزورني طيفه تقل عايش الآن
طيفه تحداني وحطم سكاتي=لين أنفجر صمتي تعابير واوزان
أضحك مع العالم وتضحك شفاتي= وانا الجريح اللي تدالاه الاشجان
يسج فكري لا كسى الهم ذاتي= وإذا حمدت الله تجاوزت الاحزان
الواحد اللي كامل(ن) بالصفاتي=أمره على كل المخاليق..سلطان
ياخذ ويعطي .. والاكيد الثباتي=إن القدر محتوم من عالي الشان

الموضوع الأصلي: أداوي جروح الزمان بصلاتي // لو إنها تنزف على فقد سلمان- لـ مطلق الأسمر اللغبه || الكاتب: طالب الأسمر || المصدر: .:: مجالس قبيلة الشرارات ::.