لايخلو تراث أي شعب او قبيلة او منطقة من اسهامات في ميادين الثقافه والادب والعلوم والفنون وقبيلة الشرارات تختزن في ثقافتها المتواتره الكثير من الاثار المرويه من قصص واساطير شعبيه او شعر راق تنم عن فكر خصب وخيال واسع كما انها بعيدة عن الركاكه والغثاثة والتكلف كما يحتوي ادب القبيلة على كل مايشمل التقاليد والبطولات والحروب وهي لاتعد ولا تحصى وهذا الادب التراثي بحاجة الى همم المفكرين من اجل جمعه واظهاره للناس لانه يعبر عن حاجات العصر الماضي الذي رويت فيه ويعطي انطباعا عن احوال المجتمع الذي تروي وتحكي عنه متمثلا بابطال واحداث الحكايه تللك الاحداث التي لاتخلو من لمسات انسانيه وعاطفيه وتعظبم لروح الشجاعة والبطوله والايثار وعلى الرغم من ان الشعر احتل مكان الصداره في ادب القبيله فقد كان للقصه دورا بارزا وبصورة رائعه وتسمى القصة بـــــ( السالفه ).......
وانني لن افسر او ادخل رأيي الشخصي في السالفه بل سأتركها كما هي لانها اكبر بكثير من ان اضيف لها شيئا واولى هذة القصص التي سارويها الليله هي من الاساطير الشعبيه ومن تراث قبيلة الشرارات وهي سالفة (السعلويه ) ......وعادة ماتقوم العجائز من النساء بسرد مثل هذه القصص للاطفال ليلا ليخلدوا الى النوم اثناء او مع نهاية القصة ........كما يقوم ايضا احد الرجال الكبار بسردها على الرجال والاولاد ليلا لهدف التسليه والتعلله وعادة ماتبدأ السالفه بعبارة (قال الله وقال خير )
الســــــــــــعـلويــــــــه
*** الراوي : شليل بن خامر اللحاوي ....عن أبيـه ..خامر بن طفحان اللحاوي يرحمـه الله ***
قال الله وقال خير
في قديم الزمان كان فيه عرب لهم على جو وجوا القوم وغاروا عليهم في النهار وكان فيه امرأة من العرب حطابه لما صارت الغاره ورجلها سرح بقعوده فلما جاء الرجل قال لها ياأمراة وين العرب قالت والله غاروا عليهم قوم وتفرقوا وقال وانتي كيف سلمتي قالت والله جيت انا من الحطب وما عندي شيء يأخذونه والله سلمني انا وعيالي قام الرجل وعقل القعود والا الله جايب لهم عنز هذا كبر ديدها وهم جوعى وعطشى قالوا ياحلونا اللي الله جاب لنا هالعنز ...واحلبوها بالطاسه وشربوا كلهم قال الرجل تشوفين ان الله ماقطعنا واخذوا على هالجو حول خمسةعشر ليله والعنز تسرح وتروح عليهم ويحلبونها ويسوون لبن وزبده ومريس غابت العنز ....وقوطرت المرأه تدورها يوم جت والا العنز لها بغار وتنفل شعرها فظت المرأه وراعت لاهلها وقال لها الرجل انتي مالقيتي العنز قالت المرأه (عنزنا سعلويه )قصيت جرتها ولقيتها بالغار تنفش بشعرها قال لها الرجل هالحين عقب اللبن والخير تقولين ذوان ان عنزنا سعلويه يوم فكروا والا العنز جايه تفاحج هذا كبر ديدها قال الرجل ارعها جت ذريا ذريا يالله حي ذريا ويقوم الرجل ويحلبها ويشربوا من اللبن هو وعياله والمرأه عيت اتذوق اللبن لانها شافتها وعارفه انها سعلويه قالت المرأه يارجل خلنا نلحق العرب قبل ماتاكلنا السعلويه قال انتي مهبوله قالت انا وعيالي ودي الحق العربان قال لها طسي اصبح الصباح وسرحت العنز والمرأه تقوم وتحط بيتها على القعود وتركب هي وعيالها وتقلط الله وخلت الشايب على الدار وتمشي وتمشي وتمشي يوم جت العنز والا الدار بيضاء .....قالت يالوعتيه من حليبي وزبدتي اللي اكلتوه واصيدتي عقب مابردتها وتجي لك تنهض والا الحوض مكفور يوم رفعته والا الشايب تحته قالت العنز اه ماظل غير انت منين اكلك قال كليني مع لحيتي يوم ماطعت شور مريتي ....وهي تاكله وهي تجي لك مع اثر المرأه وعيالها وتقص وتقص وتقص قالت المرأه لبنتها يابنيتي شوفي طلي وراء انت تشوفي شيء ...؟؟ قالت يمه اشوف شيء زي الشعيره وهن يمشن ويمشن ويمشن قالت يابنيتي شوفي هو احد لحقنا قالت والله اشوف مثل الابره ويمشن ويمشن ويمشن قالت والله اشوف مثل المخيط قالت لها امها يابنيتي تكحلي وتورسي وش تشوفين ..؟؟قالت يايمه والله اشوف كبر البيت يومن انها اقبلت على العرب وازبنت والسعلويه تلحقهم و هي تقول يومن ماالحقك يلحقك شخيب(ن) مني وهي تشخب من ديدها على رجل البعير... السعلويه انكست والمرأه وعيالها صاروا مع العربان والا رجل البعبير يوم قامت تنتفخ تنتفخ وغدت حبن هذا كبره وهو ينفظخ ويو انفظخ والا هي ابنيه قالت الام مالنا غرض بيها قالوا العيال يايمه هذي اخيتنا والله جابها لنا هذي خلقت الله ...واخذوا يسقونها من لبن البعارين يومن ياخذون بالليل والا الناقة الفلانيه ميته علامها قالوا ممكن مقروصه يوم اخذوا ثاني ليله والا الناقه الثانيه ميته مثل الاوله تقعد اكبر العيال وقال والله اني لاشوف هالسايه اللي تاكل بعارينا وشيه ويغلبه النوم وينام ويقوم اخوه الثاني وقال انا اللي اقعد واشوف وغلبه النوم ونام ويقوم اخوهم الصغير وقعد طول الليل وشاف البنيه وهي تقوم من مقاطتها وتنجحر بذنب الناقه وتاكل اللي بيها من شوايا وهو يقعد اخوانه ويوريهم قالوا يايمه هذي بنتك ( بٍٍيضه ) هي اللي اكلت البعارين قالوا وش نسوي بيها ..؟؟؟؟
القابله ...... ان الله احيانا .....نكمل سالفة السعلويه
وين وصلنا البارح ...؟؟؟
قالوا السامعين وصلنا لما شافوا البنيه بيضه وهي تاكل البعارين ......وقالوا وش نسوي بيها ....
قال الله وقال خير
قوطروا لعجًيز السوء قالوا ياعجيز السوء السالفه هاللون وهاللون وش نسوي بالبنيه قالت احرقوها بالنار وهم يقوموا ويحرقوها بالنار وهم يرحلون يوم رحلوا وهي تلحقهم قالوا يالله لاتعيدها قالت انا تسخنيت عالنار وجيت قالوا ياعجيز السوء السالفه هاللون وهاللون قالت قطعوها قطع قطع وحطوا على كل رظمه قطعه حتى ياكلنها الكلاب والذيابه وقطعوها وحطوا على كل رظمه قطعه واكلنها الكلاب والذيابه كلها الا مصير واحد بقى .......يوم اخذوا والا هالمصير يوم تولجهم ان رحلوا معهم وان نزلوا معهم رموه بالقليب قال تغسليت وجيتكم ياخوالي ورموه بالنار قال تسخنيت وجيتكم ياخوالي وهو يدوهجون لعجوز السوء قالوا ظل من السعلويه قطيعه وش نسوي بيها قالت لهلموها لكم بعجينه ويوم ترحلون ارموها على الدار يجي لها ذيب وياكلها سووا العجينه وحطوا المصير بيها ورموها على الدار وهو يجي الذيب وياكلها .....
جاء الذيب وده يهد........يومن يهد على الغنم يصيح المصير من بطنه واووهوووه ياهل الغنم غنمكم وكلت ياهل الغنم ...!! وهم يفرون العربان والكلاب ..... ويقوطر الذيب يم عجيز السوء قال ياعجيز السوء انا في بطني لي شر ان جيت لي عرب صاح عليًًه وان جيت لي غنم صاح عليًه ...!!!! قالت اسمع قال ايه قالت راقب العرب يوم يقشًدون ....ويوم يقشًدون العرب وتشوف ان المرأه قشدت أغر والقم لك لقمه حاميه من قشدتها حتى يوم تاكلها تطلع مقابل وهو يغير على العرب يومن ان المرأه قشًدت وهو يغب بفمه والمصير يطلع من الذيب وقام المصير ولحق خواله قال لهم رافقت الذيب ولحقتكم ياخوالي قالوا الله لايحييك وهم يقوطرون لعجوز السوء قالوا ياعجوز السوء والله انك عجزتي واحنا عجزنا ماقدرتي تسوي شيء قالت لهم لا انا اقدر اقظبوووه وحرًقوووه بالنار واسحنوه والا سحنتوه اعطوا الشرقيه شويه والغربيه اشويه والشمالية اشويه والجنوبيه اشويه وسووا مثل ماقالت عجوز السوء وتخلصوا منه
الله يعطيك العافيه يالسهل ويرحم شليل بن خامر اللحاوي وأبوه رواية كثيرآ ما نسمعها وبأشكال كثيره فيه شئ من الأساطير ولكنها كانت للتسليه الله يرحم من سمعتها منها وهذه ليست فقط عند الشرارات بل في كثير من القبائل حتى أن هناك وادي بالقرب من ضباء اسمه وادي السعلوه وكذلك عجيز السوء أو السو التي كثيرا ما نسمع نصائحها لدغه ومثيلاتها
شكرا لك على التطرق لهذا الجزء من تراثنا يبدو أن لنا في جعبتك الكثير فلا تبخل علينا تقديري
لاشك بأن القبيلة لها قصص سوآء كآنت من نسج الخيآل ،، او من عين الحقيقه
والله اني سمعتها سآلفة" السعلويه" من عجيّز الله يذكرها بالخير وتخرعنا بقصصها المُرعبة في حين الطفولة آن ذآك
موضوع رآئع بحق والأروع انك تطرقت لهذا الموضوع وخصوصاً هذا القسم في المجآلس له ثقلة وحجمة من بين كل الاقسآم بعد القسم الاسلآمي اولاً
قصة استمتعت في القرآءة ونتظر جديدك بارك الله فيك
شكراً جزيلاً كآتبنا المُتميز السهل الممتنع
وفقك الباري
جوديه بالخير مرويـــــــــه
وعليكم السلام ورحمة الله وبركاته كنت اترقب حضورك لمتصفحي منذ مدة لاتشرف بتواجدك واخيرا احضرتك السعلويه اسعدني حضورك الكبير والراقي سيدتي .........فالشكر لك اولا واخيرا تحياتي واحترامي
بسم الله الرحمن الرحيم السهل الممتنع السلام عليكم ورحمة الله وبركاته اعادة قصص الماضى جيدة ولو انها تتشابة بين المجتمعات اللة يرحم الراوى ويسلم لسانك اخوك عواد الهران
السعلويــــــه ..من تراث القبيله 
ياكبره 
طبعا هالقصه تختلف كثير عن اللي كانت ترويها جدتي
العرض العادي
