الموضوع: صبر المهادي ..!
عرض مشاركة واحدة

المحيط

عضو مُميز

اقتباس:
المشاركة الأصلية كتبت بواسطة فرحان قيران مشاهدة المشاركة





.

.

.


الإهداء الى اخي عايد رحيل الشمري ولكل متذوق للشعر اتمنى تحوز على رضاكم






سلام ياعايد من الرأس للراس = سلام (ن) الطف من هبوب البرادي

به فل جيزان وشذى ورد مكناس = وجاوي وكمبودي على شوي كادي

اغليك ياعايد رحيل بلاقياس = يشهد على ماقول رب العبادي

مهو غلا طعمه لحمزه وعباس = والاغلا حوزات قم لنجادي

الاغلا من قلب وشعور وإحساس = غلا الرجال اهل الشرف والمبادي

اربع خصال فيك للطيب مقياس = شهم وعفيف لسان عاقل وهادي

وعقب السلام اسمع ذهب واترك نحاس = ماينقله تلفاز والا روادي

شعر يتله باس ويعدله راس = عليه توقيعي وختم اعتمادي

ياصحت فيه ورحت لي فيه مرواس = يجيك مثل أسراب هيض الجرادي

انا عليه مصنف (ن) من أولي الباس = اذا قدح راس الفتيله زنادي

ماهي بلحية واضرب أخماس بااسداس = الا كما سيل (ن) جرف بطن وادي

ياعايد البارح من عماس لعماس = الشعر نادى له براسي منادي

وشديت لي من سبق الشعر عرماس = وفوق الشراريه نسفت الشدادي

ضامر عساف وعينها تقل مقباس = شيبا ظهر حمرا عريضة توادي

دكيتها بين المغيرب والادماس = وقامت تلفّت والمسافه تنادي

هجت هجيج وبالرسن تضرس أضراس = كنك تدح جنوبها بالهوادي

ماسندّت شكوى على كل بلاس = ولا وجهت يم الكذوب الربادي

ان جنبت شرواك تبشر بالإفلاس = يالشمري نسل الرجال النوادي

ضيّعت فرخ وضيّع الحظ قرناس = والفرخ ماهو هم لوكان غادي

الهم ضيعة صافي الريش مدباس = قرناس ياعايد على الفرخ بادي

آليا شهر فرجه وياهد فرّاس = ويا ادلى على الحفال يفرى الثنادي

اذا صعد جو وتنكس تنكاس = تقل من كفوفه تسل الهنادي

ياماجهمت لضيعته تقل عساس = في كل عيطا بس اصيًح وانادي

لكن رجاي برجعته طمها الياس = وعن كاذب اوهامي قنعت بوكادي

الله من الضيقة ومن قل الاوناس = ومن تكلفة زرعي وندرة حصادي

ياعايد المطنوخ يامعّرب الساس = صبري بوجه العوج صبر المهادي

يانسل من فيهم على الخطر ينداس = جزارة الحايل كعام المعادي

البارحه كني بلي وسط محماس = بقعا تقالبني على غير قادي

الرأس ياعايد تساوى مع الفاس = ومن التعب حاربت شربي وزادي

الله وكيلك يوم جريت الأنفاس = كنه يغني وسط صدري عبادي

البارح ابو دباس مشتاق لدباس = ودباس يذكر له بسجن انفرادي

من دونه إقفال وحواجز وحراس = شهرين صبر ولا تقنطر جوادي

ساكت وانا كبدي تسًرد بالامواس = أزرى عناد الوقت يكسر عنادي

لو كان مذنب قلت حقه ولاباس = مظلوم والزعلان يأكل زبادي

يلعب بنا وسواس يسند بخناس = هذاك (متحلطم) وذاك اقتصادي

وياضاق صدرك حولوها لحواس = وحواس طول الوقت لونه رمادي

وكل الثلاث اوباش وانذال وانجاس = وموقف معًدل كل مايل حيادي

ادري واعرف ان الخطأ ديدن الناس = العيب ماهو بالخطأ بالتمادي

يانايم استيقظ كفى نوم ونعاس = اقبل على صبرالحليم النفادي

حدر (الخضر) لاتحسبنا بتكساس = احذر صباحي وانتبه من هجادي

الدار وحدها معًزي على ساس = والعدل حطه بالمكان القيادي

وان كان في راسك على الظلم وسواس = أذلف لحكم المالكي بالرمادي

مافيه غير الشرع بالمملكة راس = محجته بيضا ودربك سوادي

ما فيه نصر الله ولا مصطفى طلاس = بحكم السعود وخل عنك الدوادي

سجلت ما شفته لعايد بقرطاس = حبيت افضفض لجل يبرد فوادي

اقبلت فارس يلبس الدرع والطاس = واقفيت حاديني من الغيض حادي

واسلم عدد ما داعب الورد نسناس = وعداد ماجًود زماني قيادي

الهم صلي وسلم على سيدنا محمد عليه افضل الصلاة والتسليم

الشاعر الكبير والقدير

فرحان قيران الدهمشي العنزي

بالبداية اسئل الله العظيم ان يفك ابنك المسجون فيصل وتقر عينك به سليم معافا

اما بخصوص تلك الفارعه وماتحمله من ألم وامل بين الوجد والتوجد فيصعب التعليق عليها فهيا فوق كل تحليق واطراء وثناء ولا ينافس تلك الجزاله الا جزالة وفاءك ونبلك وطيب معدنك الاصيل ونقاءك المتجلي بالصدق

بتلك الفارعه الشامحه كل مايحتاجه اي شاعر مبتدأ ليتعلم كيف يكتب النصوص الفخمه

مشد حريف ومتمكن واسترسال واسهاب شيق وممتع..وترابط وتماسك وتناغم عجيب تبارك الوهاب وانتقاء للمفرده دقيق بسعة خيال خصب وواسع وقدره فائقه على تطويع الصعب بكل حرفنه شعريه
وتصوير دقيق معنا ومغنا

للله درك يابو فيصل واسئل الله العضيم ان يقر عينك بفيصل عاجلٍ غير اجل

صح السانك وعلا شانك

نسيت ملاحظه::اعتقد اني شفت عنوان تلك القصيده بالبدايه (الشراريه) فهل تم التعديل من قبل صاحب القصيده او من اجتهاد غير موفق ان لم يكن صاحب النص طلب ذالك

فائق التقدير والحترام