الموضوع: صوت الرعد
عرض مشاركة واحدة
الصورة الرمزية فرحان قيران

فرحان قيران

شاعر



@( صـــــوت الـرعـــــــد )@

يازين جو(ن) راح يابو سليمان =تمطر سحابه تقتفيها سحابه
البرق مثل النار في غر الامزان =وصوت الرعد يضفي عليه المهابه
سبحان من يرسل من المزن هتان =اللي بعث طه بمحكم كتابه
اللي جعل للحق بالعدل ميزان= استغفره وارجيه وأخشى عذابه
ربي وانا عبده ومذنب وندمان =أستعطفه والوذبه من عقابه
عبده وبن عبده ومخطي وغلطان =جاء في رجى الرحمه ونوخ ركابه
ياما ارتكبت من الخطأ سر وإعلان =الذنب ثابت والليالي تشابه
جعله يقابل كبر ذنبي بغفران = في يوم ينساك الولد والقرابه
مافيه لأصاحب ولا فيه خلان = الا الذي ياضاق عبده لجابه
منان متكبر وللخلق رحمن =وعن طالب الغفران ماصك بابه
والا البشر ما بالبشر غير الأحزان = مثل الوحوش اللي تطارد بغابه
جربتهم والتجربة خير برهان = صاروا على دامي صوابي ذيابه
تتابعت طعناتهم والخفي بان = واليوم صدري صار منهم خرابه
ولا لنت من طاقتهم والحجر لان = أزيدياشدوا شموخ وصلابه


التعديل الأخير تم بواسطة محمد العابر ; 06-01-2014 الساعة 11:53 PM