|
يابعد فرق البارحه عن مسا اليوم=أبعد من نجوم السماء للبلادي
غاب الوليف اللي به أصبحت ملزوم= طيفه نزح بين الحضر والبوادي
لاصار حي ولابعد قيل مرحوم =ولاصار من بين المذاهيب غادي
أستر عيوبي بين هالناس بهدوم=غير.. العيون دموعها صار بادي
الصاحب اللي ركز القلب بسهوم=وأصبح بوادي والمشقا بوادي
مهما إبتعد ماوالله آتوب وآشوم=لوهو تعمّد في عذابي عمادي
ماأنساه لو يرجع زمن فارس الروم=ولو شفت من ضمن العرب قوم عادي
لأسهر بليلي وأنحرم لذة النوم=وحرام مافك التعب بالرقادي
لأسج وأرقب فوق طيران وحزوم= وعليك به يانبرة الصوت نادي
نادي ولو فيه الرجا صار معدوم= وحداه عني أشهب اللال حادي
يمكن يجي من طايش القوم بعلوم= ولاتسألينه هو خيال أو وكادي
ودي أعيش بطيف ذكراه لو..يوم=لو بعدها قالوا لقبرك تقادي
ياعاذلي خل العتب عنك واللوم=ماني بمثلك مستريحاً وهادي
|
