|
لا والله الا صار للبدو تنجيع = وكلن نواله نية(ن) مد صوبه
صبح الرحيل مشمرين(ن) مفاريع = وكلن ينافذ محزمه بي جنوبه
قشر النواظر طايرين الجنازيع = باتوا على نو الرحيل ومشوبه
وتفرقوا فرقى عيال الجرابيع = واللي يود اليامهم شمتوبه
تلوعه لوعة نهار التواديع = اكثر من ضحكة خاطره بالف نوبه
وقت(ن) ضحك به يوم وقت التجاميع = والله ما يسوى نهار العقوبه
اقفت جهامتهم وانا امد واريع = مع راس حزم(ن) شففوا واتقوا به
واقفن بهم مثل السفاين مع الريع = مع سهلتن متسمحاتن دروبه
ايمانهن تومي اوماي المقاليع = وعجز المحوّل لا يتعلـّـق ركوبه
تقلـّـعوا مع قفر الارياع تقليع = بين المقام ومنزلن ما بنوبه
تلقى به الفطّر لذيذ المراتيع = يدعي على الخلفات مثل الركوبه
وانا مرض حالي يجيها تناويع = ونفسي على زادي تقول مغصوبه
كني مريض(ن) قومته بالتمانيع = وممشاه من عقب المشاوير دوبه
عسى يجن من الشراقي ذعاذيع = حر(ن) يسم الوجه لفحة هبوبه
وجعله ينش القاع عقب التناقيع = وعسى غدير الما يموت دغلوبه
ويصير بي عشب الدغالين توجيع = ويلتف لين انه تنثر حبوبه
تلقى فروخ الحمره به مقافيع = عريان لبس وقاصرن عنه ثوبه
وتسمع لحنين الجمل به قعاقيع = مفلاه حمض ولا بعوده رطوبه
يحن وده باردات القراطيع = من مبرك(ن) حامي وشمس(ن) لهوبه
حر(ن) يميّـع ثومة الكبد تمييع = ام اللبن ما كنها به حلوبه
ايام غيبات النجوم اللواميع = ست اشهرن تمضي عليه محسوبه
راع الهوى يعدهن بالاصابيع = والناس عدى الوقت ما برّقوا به
ليله طويل ومجضعه به تواجيع = وصبحن على مثله يشادي غروبه
يشوف من وقته قراده وتلقيع = ودنياه ما تاتي يغير بصعوبه
|
