|
قف يا قدم رجلي بالاطلال ساعة = حيث الهوى راحت طراته وجبت آه
يا شين بعد(ن) ما يحين اجتماعه = ومنزال حي(ن) قامت الريح تذراه
يلعب غراب البين من فوق قاعه = قفر(ن) عذا فيها ام سالم صفى غناه
حل الفراق وداله القلب لاعه = يوم(ن) فضا سده وبيح خفاياه
من دونهم يلعب سراب الوساعه = مت ابضماي وكل مقرب جحد ماه
والذيب من دونه يعوقه اضلاعه = ويشمت على حضه اذا ليله امساه
وراع الهوى من حسرته والتقاعه = عيا لسانه لا يبلل شفاياه
مثل المريض بطيحته وامتناعه = ويعيش مشبوه(ن) على شان تهماه
ما عندي اغلا من دموعي بضاعه = هان(ن) عليه في مباعه ومشراه
هانت عليه شيمتي في ضياعه = وعليه صعبت شيمته بالمواساه
قلبه عليـّـه قاسي(ن) بالقطاعه = واذا التفت لي قال حقه وما جاه
ما يدري ان العشق تقوي سباعه = ولا مات طنيان المحبين لولاه
من راح يتبعنا بعيد(ن) مراعه = ويموت ما بين الرجا والمطاناه
نحط في قلب العميل الولاعه = ونحول دون العافية لا تمثناه
وانا كلامه ما عطاني قناعه = اصد عن ما قال لي واتغاضاه
تركض لها رجلي براس الرفاعه = وارقب لها في مرقب الطير وجفاه
تكن له روحي موده وطاعه = واضحك لها ضحك الضعيّف لمولاه
ودور السنه يمضي على شان ساعه = ومتحمل(ن) شره على شان حسناه
ولعبت له لعب القمار ابـّـراعه = وقعدت له في موقع(ن) بارد(ن) ماه
وجريت سلكي واتحرى انقطاعه = نوب(ن) يجي يمه ونوب اتماضاه
|
