ان طعت شوري ياسعد لا تعرف = بالولف كاننك تريد العوافي ان طعتني ضب الخفي لا يتكشّـف = واصبر على ما حس بك يالسنافي اخاف من عقب التكانه تخفخف = ويغربلنك بالعلوم اللطافي غبة بحر من طب ركنه توهلف = وصعبا على من طبه الاحترافي ويلا واجهت الموت يا مسندي خف = والموت هرج لطيفات الاشافي الموت اسمه موت بين ويعرف = لكن هن موتا على الروح خافي طرادهن بحالته ما يتصرف = ويشيب وهو يركض مع البيض قافي ولو ضحك قلبه على الزين ينلف = لف الهوى قشع(ن) على راس شافي وبه شارة(ن) بين المخاليق تعرف = ويصبح ثمر قلبه عليهن هيافي سفيه يا غير ان ماهو مكتف = ولوله منكـّـف يستحق الكتافي اسمع وصاتي يا سعد لا تكلف = قبل يجي دمعك من العين صافي تراي قبلك جيت في كل مااشرف = وركضت مع حرش الحراجيف حافي وجلست في راس الطويل المهايف = ولا شفت يا غير البلا والتلافي وصفقت من الاياس كفا على كف = ورجعت اكايد عبرتي بالتهافي وانا على خلي كثير التحسف = واجر وناتي طوالا(ن) صلافي خلي طواني طي قدا ملفف = شمس الضحى اركت عليه النشافي ياعود غصنا من ثرى السيل ما قف = ريح الشمال نكفه بأنعطافي تعال شفلي حالتي لا تطرف = اخاف من روحي إيلا رحت تافي انا مريض الحال وانت المكلف = واسباب شري منك بين وخافي وحرام تنسى يا حسين السوالف = وتروح ما كن لك عليّ اعترافي

أدوات القصيدة

النسبة 1/5 (1 اجمالي )

• 1
• 2
• 3
• 4
• 5